Қуёшни ҳам кулдириб,
Қалбга сурур тўлдириб,
Дўстларни суюнтириб,
Рамазон келди, Рамазон!
Саҳар туринг ёронлар,
Хатм қилинг Қуръонлар,
Дод деворсин шайтонлар,
Рамазон келди, Рамазон!
Ғафлат ойи эмас бу,
Нафрат ойи эмас бу,
Раҳмат ойи демак бу,
Рамазон келди, Рамазон!
Сергаклик аҳди бўлган,
Мўминнинг бахти бўлган,
Исломнинг фатҳи бўлган,
Рамазон келди, Рамазон!
Енг шимаринг тоатга,
Иймоний ҳаловатга,
Эришинг саодатга,
Рамазон келди, Рамазон!
Иймон кучга тўлади,
Шайтон қулфланади,
Руҳул Қудус инади,
Рамазон келди, Рамазон!
Рамазонда cабр бор,
Етти юз қат ажр бор,
Минг ойга тенг Қадр бор,
Рамазон келди, Рамазон!
Бу ой Марду майдондир,
Кутиб турган Райёндир,
Суму, деган Раҳмондир,
Рамазон келди, Рамазон!
Савоб ишда илдам бўл,
Исломда пешқадам бўл,
Эй Маҳбубий маҳкам бўл,
Рамазон келди, Рамазон!
Қуёшни ҳам кулдириб,
Қалбга сурур тўлдириб,
Дўстларни суюнтириб,
Рамазон келди, Рамазон!
Аброр Мухтор Алий