Пайғамбаримиз соллаллоҳу алайҳи ва саллам: “Гуноҳлар ичида шундайлари борки, унга фақат ҳалол ризқ топиш мақсадида қилинган ҳаракат каффорат бўлади”, деб ўгит берганлар (Табароний ривояти).
Абу Ҳурайра розияллоҳу анҳудан ривоят қилинади: Пайғамбаримиз соллаллоҳу алайҳи ва саллам: “Шундай замон келадики, одамлар ўзи топган молу-дунёсини ҳалол йўл билан топдими ёки ҳаром йўл билан топдими иши бўлмай қолади”, дедилар (Имом Бухорий ривояти).
Буюк аллома Абу Лайс Самарқандий дедилар: “Ким касбининг ҳалол бўлишини хоҳласа беш нарсани маҳкам тутсин:
касби сабабли Аллоҳнинг бирорта фарзини ортга сурмасин ва уларда нуқсонга йўл қўймасин;
касби сабабли Аллоҳнинг махлуқотларига озор бермасин;
касбидан мол жамлашни эмас, балки ўзи ва аҳли-аёлининг иффатини сақлашни ният қилсин;
касб қиламан деб ўзини ортиқча қийнамасин;
ризқ Аллоҳдан деб билсин, касбдан эмас, касб – сабаб, холос. Касб қилувчи ҳар бир мусулмонга ҳалол касб қилиш илмини ўрганиш вожибдир”.
Пайғамбаримиз соллаллоҳу алайҳи ва саллам: “Аллоҳ таоло ҳунарманд бандани яхши кўради”, деб марҳамат қилганлар (Термизий ривояти).
Ойбек МАЪРУПОВ,
“Кўкалдош” ўрта махсус ислом билим юрти талабаси
