Дўстларим! Кимнинг қалбида Аллоҳга муҳаббат ва У зотга яқин бўлиш нияти бор бўлса, бу мақомга эришиш учун яқинлаштирувчи йўл излайди.
Мана шу сабабдан Аллоҳнинг валий бандалари беш вақт намоз ўқисаларда, қалб чанқоғи қонмасдан, Аллоҳ ила янада кўпроқ ҳамкалом бўлишни, дийдорлашмоқни истайдилар. Гоҳ «ишроқ» нафлларини адо этсалар, гоҳ «зуҳо» нафлларини, гоҳо «аввобийн» нафлларини адо этадилар, гоҳо таҳажжуд нафлларини вирд қилиб олганлар. Баъзида таҳорат қилиб, ортидан икки ракаат «таҳийятул вузуъ нафли» нияти билан жойнамозда турсалар, баъзида масжидга кириб «таҳийятул-масжид» ниятида икки ракаат нафлни ният қиладилар. Бу нафллар Аллоҳ таолога яқинлаштирувчи йўлдир. Ҳақиқатда, оламлар Робби билан ҳамкалом бўлмоқни истаётган бўладилар.
Биз ҳам аҳли зикр дўстларимиз каби фарз ва суннат намозларини ўқиб, нафл намозларимизни хам йўлга қўйишимиз ва нафл намоз ўқишга харис бўлишимиз керак. Ибодатлар ичида энг улуғ ва кўзимиз нури бўлмиш намоздан бошқа ибодат борми? Хаттоки қиёмат куни фарз намозларимизда камчиликлар бўлса, тўлдирувчи нафлларни қўшиб фарз қабул қилинади.
Шунинг учун нафл намозларни шариатимизда кўрсатилган вақтларга мувофиқ ҳолда, адо қилишга харакат қилишимиз керак.
Шайх Зулфиқор Аҳмад Нақшбандий ҳафизаҳуллоҳ. «Илоҳий муҳаббат» китоби. 43-бет.
Абдулвоҳид Иброҳим домла таржимаси.
Эслатма:
Ишроқ — қуёш чиққан пайтда,
Зуҳо — чошт вақти,
Аввобийн — шом намозидан кейин,
Таҳажжуд — кечанинг охирги қисмида,
Таҳийятул вузу — таҳорат олгандан сўнг,
Таҳийятул масжид — масжидга кирган пайтда ўқиладиган нафл ибодатлардир.





