Уламоларимиз ва устозларимизга эътибор қилинса, Аллоҳ таъоло уларнинг ҳар бирига бошқасида топилмайдиган хос хусусият ва фазилат ато қилиб қўйган бўлади. Қайси бирларининг ҳузурида ўтирсангиз, ўша хос хусусиятдан истифода қилиб кетаверасиз. Аллоҳ таъоло устозимиз Мавлоно Ёрқинжон қори раҳимаҳуллоҳга ато қилган энг катта хусусиятларидан бири Ҳиндистон уламоларининг катта илмий захирасини қалбларида жамлаб қўйган эди. Тақдири илоҳийга иймонимизда шак йўқ. Ҳар бир жон борки, ўлимни татигувчидир. Тақсиримнинг умрлари илм ўқиш, ўқитиш ва тарқатиш ила ўтди. Бунга барчамиз шоҳидмиз. Вафотларидан анча олдин тавсиялари ила камина ожиз шайхул ислом, муфтий Муҳаммад Тақий Усмоний ҳафизаҳуллоҳнинг бир китобларини таржима қилаётган эдим. Тақсирим таҳрир қилиб бораётган эдилар. Карантиндан аввал «Ақидаи Таҳовийя»нинг урдуча янги илмий шарҳи «Ал-Асидатус-Самовийя» чоп этилгани ва Ҳиндистондан қайтишда ўзларига бир нусха олиб келганларини айтдилар. Агар Ҳиндистондан келадиган меҳмонлар бўлса айтсангиз бўлар экан, дея китобнинг суратини ташладилар. Мен дарҳол Ҳиндистондан юртимизга келадиган дўстларимиздан китобни олиб келтирдим. Тақсирим китоб келдими, деб сўрадилар. Мен, ҳа келди, дедим. Таржима қилишни бошладингиз-ми? Агар таржима қилинса, халқимизга катта илмий китоб бўлиб қолар эди, дедилар. Тақсирим ўзлари илмга ва китобга қанчалар чанқоқ бўлсалар, уни халқимизга етказишга ҳам шунчалар чанқоқ эдилар. Вафотларидан ҳали ўзимизга кела олмаётганимизнинг сабаби ҳам катта илмий захиранинг ўзлари билан кетиб қолганидир. Роббим тақсиримнинг охиратдаги даражаларини юксалтирсин. Шундай соғинчлар бўлар экан, ўрнини излаб тополмас экансиз.
Абдулқайюм Комил





