Ўзни ҳаммадан паст билгувчи,
Сўзлашганда, кўзлар кулгувчи,
Садақани пинҳон қилгувчи
Эски одамлар энди йўқ.
Кўзлардаги мунг тўла хитоб,
Кунлик умр катта бир китоб...
Дуо қилса, дарҳол мустажоб
Эски одамлар энди йўқ.
Тўнин меҳмонга тўшагувчи,
Инсон каби ҳур яшагувчи,
Одам Атога ўхшагувчи
Эски одамлар энди йўқ.
Ҳатто бўрига қўймай тузоқ,
Соғлар ичра қололганда соғ,
Тушда ҳамки гуноҳдан узоқ
Эски одамлар энди йўқ.
Дўсти учун бермоқ учун жон
Яшаган ва тополган имкон.
Бировни сотмаган ҳеч қачон
Эски одамлар энди йўқ.
... Ҳолимиз шу кетар кунгача,
Иш каттарди ночор шунгача:
Энди сиз ҳам яшанг янгича,
Эски одамлар энди йўқ!!!
Х.Хамидов





