Гиёҳвандлик Аср балоси дейилади. Бу балонинг олдини олишга ҳамма бирдек бурчли. Негаки, гиёҳвандлик миллат генопонди кушандасидир.
«Наркотик моддаларни ноқонуний айланишини олдини олиш«да айниқса, чегара худудида яшовчи ахолининг масъулияти катта эканлигини ҳам унутмаслик керак. Наркобизнеснинг йўлини тўсмасак фарзандлар келажаги ҳавф остида қолади. У тубсиз гирдобдек ўзига тортган одамни омон қолдирмайди. Айниқса, ёшларнинг бу йўлга кириб қолишига йўл қўймаслик муҳим ахамиятга эгадир. Давлатимиз раҳбари томонидан қушни давлатларга кириш- чиқиш осонлаштирилиб, қоғозбозликлар, оворагарчиликларга барҳам берилди. Бундан азалдан қуда- анда, қариндош- уруғ бўлиб кетган қушни давлатлардаги дустларимиз ва юртимиздаги фуқаролар жуда хурсанд бўлдилар. Эндиликда у давлатдан бу давлатга бемалол ўтиш- қайтиш мумкин бўлиб қолди. Аммо, “Гурунч курмаксиз бўлмайди” деганларидек, бу имкониятлардан миннатдорлик билан яхшилик йўлида фойдаланиш ўрнига, баъзида, ғараз ниятда фойдаланувчилар ҳам чиқиб қолаяпти.
Ўз нафсини ўйлаб “Гиёҳвандлик”дек балони ўз юртдошларига раво кўраётганлар ҳам бор. Эндиликда уларга қарши туриш умуминсоний бурчга айланмоғи заруриятдир.Шу ўринда айтиш мумкинки, бу офат бутун Ер юзи аҳолисининг оғриқ нуқтаси ҳисобланади. Афсуски, “ Гиёҳвандлик” ёшариб бораяпти. Бу боши берк кўчага 13-14 ёшдан 18- 30 ёшгача бўлганлар кириб қолмоқда. Бу дегани улар 3-4 йилдан ортиқ яшолмайди, наслни давом эттира олмайди дегани. Улардан тасодифан фарзанд туғилиб қолса ҳам майиб ва мажрух фарзанд туғилади. Бу оила бошига келган катта кўнгилсизликдир. Гиёҳвандлик кўчасига кириб қолганлар билан сухбатлашсангиз. Шу йўлга кирган кунини, сабабчиларини лаънатлайди. Агар бу йўлни ҳавфли эканлигини менга ота-онам ёки, бирон ким тушунтирганда эди, бу йўлга яқин йўламас эдим деб афсусланади. Ёшларга ҳам, катталарга ҳам “Гиёҳвандлик ҳаёт неъматларидан бебаҳра қолишдир,огоҳ бўлинг” дегимиз келади. Инсон ҳужайраларининг бирон нуқтаси ҳам қабул қилинган наркотик модданинг зарарли таъсиридан қочолмайди. Бир бора гиёҳвандлик йўлига ўтган одам бу кўчадан чиқолмайди. Ўз ҳаёти билан тавон тўлайди. Инсон учун шу керакми ?
Наркомания инсоният маънавиятига зид бўлган, унинг ижтимоий- руҳий ҳолатини буткул издан чиқарадиган бедаво дарддир. Ушбу дардга чалинган кишилар борган сари жисмоний жиҳатдан кучсизланиб боради, феъл-атворида аҳлоқ –одоб меъёрларига нисбатан беписандлик, хатти – ҳаракатларида ҳам тажовузкорлик пайдо бўла бошлайди. Бу бедаво дарднинг яна бир даҳшатли томони шундаки, бугунги кунда аср вабоси деб тан олинаётган ОИТС хасталигига чалинаётганларнинг асосий қисми гиёҳвандликнинг орқасидан келиб чиқмоқда. Наркобизнес билан шуғилланаётганлар эса, шундай гиёҳвандларни кўпайишига хисса қўшмоқда. “Дунёнинг сув босса ўрдакка не ғам” деганларидек, улар келтирган гиёҳванд моддалар кимларнидир бошига бало бўлаётгани, ҳаётини издан чиқараётгани билан иши йўқ. Арзимас чой-чақа учун кимларнингдир ҳаётини осон сотаяпти.
Наркобизнесни кимлар кенгайтираяпти? Шу атрофимиздаги одамлар. Пул эвазига ўз чақалоғи кийимига “Оғу”ни яшириб чегарадан ўтказаётган аёл, ёки кексалиги учун эътиборни тортмайдиган, чегарадан наркотик моддани ўтказиб бераётган отахон, онахонлар. Эй, сиз миллат келажагига беэътибор бефарқ одамлар ўйлаб кўринг, ўша “Оғу” ни кимга раво кўраяпсиз, ўз юртдошларингизгами? Маънавий қиёфангиз шунчалар тубанми? Ахир гиёҳвандлик миллат генофонди кушандасику. Келажакка ҳавф тугдираётган заҳри-қотилку. Бугун мамлакатимизда ёшларнинг таҳсил олиши, эркин касб танлаши, қизиқишлари, истеъдодини юзага чиқариши учун барча имкониятлар мавжуд. Фақатгина ўша шарт-шароитлардан тўғри фойдаланиш лозим.
Гиёҳвандликни ва наркобизнесни олдини олиш, унга қарши курашишга фақатгина ҳуқуқни муҳофаза қилувчи органлар эмас, жамиятдаги ҳар бир инсон масъул. Мақсад дунёнинг гиёҳвандлик балосидан сақлаш, инсоният саломатлигини асрашдир.
Юртимизда гиёҳванд моддалар ҳамда психотрапик маҳсулотларнинг савдосига чек қўйиш учун олиб борилаётган тарғибот ташвиқот ишларининг янада самарадорлигини ошириш учун барчамиз бирдек хушёрликни оширишимиз, наркобизнеснинг ривожланишига узил-кесил йўл қўймаслигимиз керак. Бу ўз ўрнида бизнинг фуқаролик бурчимиздир.
Шайхулислом жомеъ масжид
Имом хатиби Ф. САЛИМОВ
